FLAZ 2026

►José Ignacio Carnero, Koldo Concejo, Tensi Gesteira, Juan Gómez-Bárcena, Lucía Solla Sobral e Antía Yáñez, no Festival Literario de Allariz os días 3, 4 e 5 de xullo do 2026.

►A nova edición do FLAZ reflexionará sobre os límites entre verdade e ficción, os novos enfoques na literatura actual e os cambios na difusión de libros a través das redes sociais.

O Festival Literario de Allariz (FLAZ) regresará os días 3, 4 e 5 de xullo cun programa centrado nos desafíos contemporáneos da literatura, as transformacións dos hábitos lectores e as novas formas de comunicación cultural. Nesta edición participarán José Ignacio Carnero, Koldo Concejo, Tensi Gesteira Juan Gómez-Bárcena, Lucía Solla Sobral e Antía Yáñez. O FLAZ, organizado pola libraría Aira das Letras e o Concello de Allariz, consolídase como un espazo de encontro entre creadores e comunidade lectora, ao redor das principais cuestións que atravesan a literatura actual.

A programación comezará o venres, 3 de xullo, ás 19.30 h, coa conversa «O peso da verdade na ficción e viceversa», entre José Ignacio Carnero e Juan Gómez-Bárcena. Ambos os autores abordarán as relacións entre historia, memoria, realidade e invención literaria.

Xa o sábado, 4 de xullo, ás 12.30 h, terá lugar o encontro «Novas olladas, inquedanzas e temas na literatura actual», protagonizado por Lucía Solla Sobral e Antía Yáñez. As dúas escritoras dialogarán arredor das preocupacións e perspectivas que expresan nas súas obras narrativas as novas xeracións de escritoras.

Pola tarde, ás 17.30 h, desenvolverase a conversa «A difusión da literatura nas redes: Novas linguaxes e novos obxectivos», entre Koldo Concejo e Tensi Gesteira. O encontro analizará o papel das redes sociais na promoción da lectura, a aparición de novos formatos comunicativos e os cambios na relación entre autores, editoras e público lector. Ambos relatores teñen abonda experiencia na comunicación sobre libros nas redes.

O festival rematará ás 19.30 h coa mesa redonda «Escribir para un, escribir para os demais», na que participarán todos os convidados desta edición. O debate xirará arredor da relación entre pulsión creativa e expectativa do público.

Ademais das conversas literarias, o domingo, 5 de xullo, celebrarase na praza do Matadoiro a xa habitual Feira de Editoras, aberta entre as 11.00 e as 21.00 h. Allariz convértese así nun punto de encontro para o libro e o tecido editorial galego, con actividades para todos os públicos. Asemade, ao longo da xornada tamén terá lugar unha lectura continuada de obras de Rafael Dieste, entre as 12.00 e as 21.00 h, para recordar o seu 45.º cabodano.

Desde a súa creación, o FLAZ converteuse nun referente cultural do verán galego, reunindo autoras e autores de distintas xeracións e sensibilidades, e apostando por un diálogo aberto ao redor da literatura, a tradución, a edición e a lectura.